سجدہ گاہ

سجدہ گاہ پتھر یا مٹی کے اس سخت ٹکڑے کو کہتے ہیں کہ جس پر شیعہ حضرات نماز کے دوران سجدہ میں اپنی پیشانی رکھتے ہیں۔ شیعہ فقہا کی نگاہ میں سجدہ گاہ کو کسی قسم کی موضوعیت حاصل نہیں ہے بلکہ ان کے نزدیک سجدہ کرتے ہوئے نماز گزار کا اپنی پیشانی کو سجدے کی حالت میں زمین، خاک، پتھر یا زمین سے ہر اس اگنے والی چیز پر پیشانی رکھنا صحیح ہے جسے پہننے یا کھانے میں استعمال نہ کیا جاتا ہو۔

شیعہ اپنے اس دعوی کو ثابت کرنے کیلئے رسول اللہ اور اہل بیت کی سیرت کو پیش کرتے ہیں کہ رسول خدا اور اہل بیت کی یہ سیرت رہی کہ وہ سجدے کیلئے ان چیزوں کو استعمال کرتے تھے۔

شیعہ فقہا کے نزدیک کربلا کی خاک سے بنی ہوئی سجدہ گاہ پر سجدہ کرنا مستحب ہے۔ لہذا وہ کربلا کی پاک مٹی سے سجدہ گاہ بنا کر اس پر سجدہ کرتے ہیں۔ سجدہ گاہ شیعہ حضرات کی ایک علامت بن چکا ہے۔ وہابی حضرات سجدہ گاہ بنانے اور اس پر سجدہ کرنے کو بدعت کہتے ہیں لیکن شیعہ عقیدے کے مطابق سجدہ گاہ وہی مٹی ہی ہے۔

خاک کربلا کی بنی ہوئی سجدہ گاہ

تاریخچہ

اسلام کے آغاز میں عام طور پر مسلمان مساجد کے فرش، خاک سے بنے ہوئے اپنے گھروں، ریت، کھجور کی بنی ہوئی چٹائیوں پر سجدہ کرتے تھے کہ جن پر سجدہ کرنا صحیح تھا۔ شیعہ و اہل سنت کی متعدد روایات کے مطابق پیامبر اور صحابہ خاک، سنگ‌ ریزوں^[1] اور خمره (کھجور کے پتوں سے بنی ہوئی جانماز)^[2] پر سجدہ کرتے تھے۔ اسی طرح شیعہ روایات کے مطابق اہل بیت بھی خاک، جانماز اور کھجور کے پتوں سے بنی ہوئی حصیر^[3] اور خاص طور پر تربت امام حسین^[4] پر سجده کرتے تھے۔^[5] آہستہ آہستہ شیعہ حضرات نے خاک کے آسانی سے دستیاب ہونے کی بنا پر اس خاک کو ایک ٹکیہ کی صورت میں ڈھالنے لگے تا کہ اس ٹکڑے پر سجدہ کی حالت میں پیشانی اس پر رکھ سکیں۔ اسے سجدہ گاہ کہا جانے لگا۔ آہستہ آہستہ اس کا استعمال شیعوں میں رائج ہو گیا اور یہ شیعوں کی ایک علامت بن گیا۔

شیعہ نقطہ نظر

شیعہ فقہ کے مطابق سجدہ گاہ کو کوئی موضوعیت حاصل نہیں ہے یعنی سجدہ ادا کرنے کیلئے سجدہ گاہ کا ہونا ضروری نہیں ہے بلکہ نماز کے دوران زمین کے اجزا مثلا خاک یا اس کے دیگر ایسے اجزا پر سجدہ کرنا صحیح ہے جو زمین سے اگتے ہوں لیکن وہ پہننے یا کھانے میں استعمال نہ ہوتے ہوں^[6]

اسی طرح شیعہ فقہ کے مطابق خاک کربلا پر سجدہ کرنا مستحب ہے اور وہ ان چیزوں میں سے سب سے زیادہ بہتر ہے جن پر سجدہ کرنا صحیح ہوتا ہے ^[7] اسی وجہ سے شیعہ حضرات امام حسینؑ کے مقتل کی مٹی سے سجدہ گاہ بنا کر اس پر سجدہ کرتے ہیں۔ ^[8]

سجدہ گاہ کے استعمال کا جائز نہ ہونا

بعض مراجع تقلید بعض شرائط اور مقامات پر سجدہ گاہ پر سجدہ کرنے کو جائز نہیں سمجھتے ہیں اور اس کے استعمال کو ممنوع کہتے ہیں۔ جیسے مسجد النبی و مسجدالحرام میں اس کے استعمال سے منع کرتے ہیں کیونکہ یہ عمل انگشت نمائی، شیعوں کی توہین کا موجب بننے اور تقیہ کے برخلاف یہ وحدت مسلمان کے مخالف ہے۔^[9]

وہابی نقطۂ نظر

اہل سنت فقہا کے مطابق سجدے میں پیشانی کو خاک پر رکھنا واجب نہیں ہے بلکہ ہر اس چیز پر سجدہ کرنا صحیح ہے جو نجس نہ ہو ^[10] البتہ اہل سنت حضرات سجدہ گاہ پر سجدہ نہیں کرتے ہیں۔ ^[11]

وہابی‌ سجدہ گاہ پر سجدہ کرنے کے مخالف ہیں اور اسے بدعت کہتے ہیں۔ جبکہ شیعہ عقیدے کے مطابق یہ سجدہ گاہ وہی مٹی ہی ہے۔
^[12] نیز پیامبر اور صحابہ ہمیشہ خاک اور سنگریزوں پر سجدہ کرتے تھے۔^[13] علامہ امینی اپنی کتاب السجود علی التربۃ الحسینیہ میں سجدہ گاہ بنانے کو بدعت کہنے والوں کے رد میں لکھتے ہیں: کس طرح اہل سنت فقہا میں سے مسروق بن اجدع مدینے کی کچھ مٹی کو اپنے ساتھ سجدہ کرنے کیلئے رکھتا تھا^[14] اس کے کام کو بدعت نہیں کہتے ہو لیکن شیعوں کے کربلا کی مٹی سے مختلف سانچوں میں بنی ہوئی سجدہ گاہوں کو بدعت کہتے ہو۔^[15] اسی طرح بعض مراجع سجدہ گاہ پر سجدے کو سنت اور قالین پر سجدے کو بدعت سمجھتے ہیں۔^[16]

اسی طرح وہابی حضرات سجدہ گاہ پر سجدہ کرنے کو شرک سمجھتے ہیں اور وہ شیعوں کی طرف سجدہ گاہ کی پرستش کرنے نسبت دیتے ہیں۔ شیعہ وہابیوں کو جواب دیتے ہوئے کہتے ہیں اگر سجدہ گاہ پر سجدہ کرنا شرک ہے تو قالین اور لباس پر سجدہ کرنا بھی شرک ہے اور وہ لوگ قالین، لباس اور سجادے کی پرستش کرتے ہیں۔^[17]

مربوط احکام

شیعہ فقہ کے مطابق پیشانی اور سجدہ گاه کے درمیان کسی چیز کا فاصلہ نہیں ہونا چاہئے۔ اسی بنا پر بعض فقہا کے استفتائات میں آیا ہے کہ ایسی سجدہ گاہ کے ساتھ نماز پڑھنا صحیح نہیں کہ جس پر اس قدر میل جمی ہوئی ہو کہ اس کی وجہ سے پیشانی اور سجدہ گاہ کے درمیان فاصلہ آ جائے۔^[18] توضیح المسائل میں سجدہ گاہ کے مسائل احکام سجدہ کے ذیل میں ذکر ہوئے ہیں۔

ظاہری خصوصیات

سجدہ گاہ کو مٹی اور پتھر سے مختلف شکلوں اور مختلف اندازوں میں بنایا جاتا ہے۔ شیعہ عام طور پر سجدہ گاہ خاک کربلا یا دیگر مذہبی مقامات جیسے مشہد و قم کی مٹی سے بناتے ہیں اور ان پر خدا، پنج تن یا دیگر ائمہ کے نام لکھے جاتے ہیں۔

حوالہ جات

مآخذ