اپنے پاوں پر کھڑا ہونا سیکھیں۔

شیخ بشیر مقدسی

 

*اپنے  پیروں  پر کھڑا ہونا سیکھیں*

*شیخ بشیر مقدسی*

*پیشکش:شعبہ تحقیق مجمع طلاب شگر*

ایک شخص جو خوددار اور عزت نفس سے سرشار تھا. غربت اور ناداری کی وجہ سے اس کا برا حال تھا.تھکن اور ناامیدی سے نڈھال تھا. ایک طرف زندگی کی تلخیوں سے پریشان تھا بیوی بچوں کی حالت زار سے چشم گریاں تھا. ناامیدی اور  مایوسی کے دلدل میں روز  بہ  روز ڈوبا  جارہا تھا. تنہائی اور بے کسی کا احساس کھائے جارہا تھا.تو  دوسری طرف عزت نفس اور خوداری جیسے نیک صفتیں بھیک مانگنے کی راہ میں مانع بن رہی تھیں. مگر اس سے ننھے  بچوں کی ناگفتہ بہ حالت دیکھی نہیں گئی، دل میں نبی اکرم (صلی اللہ علیہ وآلہ وسلم) سے مدد مانگنے کا مصمم ارادہ باندھ کر بزم رسالت میں شرفیاب ہوا. مگربات زبان پرآتے آتے رہ گئی اور دل کی مراد دل ہی میں دب کر رہ گئی. تین مرتبہ کچھ  مانگنے کی غرض سے چلا ہر بار دل کی بات زبان پر لانے میں کامیاب نہ ہوسکا. مگر جس سے مدد مانگی جارہی تھی وہ کوئی عام انسان نہیں تھا بلکہ ایک مہربان اور بنا کہے دل کی بات سمجھ لینے والی ذات تھی. اس سے پہلے کہ وہ شخص بزم رسالت مآب کو ترک کرے، نبی اکرم نے حاضرین سے بطور عام اور اس شخص سے بطور خاص  فرمایا: جو ہم سے کچھ مانگتا ہے اسے ہم دے  دیتے ہیں مگر ہم اس شخص کو زیادہ پسند کرتے ہیں جو بھیک  مانگنے کے  بجائے  اپنی محنت  اور لگن کے بل بوتے اپنے پیروں  پر کھڑا ہونے کی کوشش کرتاہے . اپنے پیروں پر کھڑا ہونا سیکھیں. یہ جملہ اس خستہ حال اور نا امید شخص کے لئے نہ فقط مشعل راہ ثابت ہوا بلکہ کسی خوشگوار جھونکے کی  مانند اس کے بے جان جسم کو ایسے چھوگیا کہ اسے  نئی جان اور بہار کی نوید مل گئی. اس مدہم جسم  میں امید ٹمٹمانے لگی. اپنے پاوں پر کھڑے ہونے  کا ٹھان کر گھر کو چلا مگر ناامیدی اور مایوسی کے بادل  ایک بار پھر امنڈ گھمنڈ کر آیا اور اسے اپنی لپیٹ میں لے لیا. کیونکہ اس کے پاس نہ کوئی  اثاثہ تھا اور ناہی کوئی قابلیت کہ جس کے بل بوتے وہ اپنے پاوں پر کھڑا ہو سکے. پر ہمت نہیں ہاری کچھ ڈھونڈ رہا تھا کہ نگاہ گھر میں  پڑی  کلہاڑی پر ٹک گئی . کلہاڑی لیکر جنگل کی طرف لپک گیا اور خشک لکڑی لاکر بازار میں فروخت کرنے کا کام شروع  کردیا. کچھ دنوں میں حالات بہتر ہوئی اور گدھا خریدنے کا پیسہ بھی مہیا ہوا. لکڑی لانےکے لئے گدھے کا سہارا  لیتے  ہوئے اس مختصر سی تجارت کو وسیع  پیمانے پر انجام دینا شروع کردیا دیکھتے  دیکھتے یه غریب اور نادار مگر با ہمت اور خود دار شخص شہر کا سب سے امیر اور مالدار شخص بن گیا. یقینا  کیمیا کا کام کرجاتا ہے    معصومین کا فرمان.
مگر ان  لوگوں کے لئے جو ان کے فرامین پر عمل بھی کرتے ہیں . دونوں جہاں سنور جاتے ہیں انکے  جو معصومین  کے  فرامین کو اپنے لئے مشعل راہ قرار دیتے ہیں.چنانچہ امام باقر علیہ السلام  نے جابر جحفی  سے فرمایا : دنیا اور آخرت  کی کامیابی ہماری اطاعت اور پیروی کرنے میں مضمر ہے.

یہ سبق آموز قصہ جہاں ہماری انفرادی زندگی کے لئے مشعل راہ بن سکتاہے، وہاں ہماری اجتماعی زندگی کے متعلق  بھی  اس سے درس لیا جاسکتا ہے . جس طرح ایک ناچیز  اثاثے  کو بروے کار لاکر  انسان  زمانےکا سب  سے  امیر شخص بن سکتاہے تو اسی طرح اپنے اندر موجود قابلیت اور  صلاحیت کو بروے  کار لاکر دنیا کے کامیاب ترین لوگوں میں بھی شامل ہوا جاسکتاہے . صرف اپنے اندر موجود استعداد اور صلاحیت  پر اعتماد کرتے ہوئے اسے پروان  چڑھا نے کی ضرورت ہے. اور  اجتماعی و معاشرتی لحاظ سے  ہمیں یہ سبق ملتاہے کہ ترقی، پیشرفت اور  وقار اس قوم کے افراد کا قدم نہیں چومتی ہیں  جو  ہمیشہ یہ توقع لگائے بیٹهتے ہیں کہ کوئی مسیحا آئے اور انکے سارے مسائل کو حل کرے نیز ترقیاتی کاموں کی انجام دہی میں کوتاہی برتتے ہیں.

نہ سیاسی اور سماجی شخصیات  سے  اپنے حقوق  کے لئے  مطالبہ کرنے کا سلیقہ جانتے  ہیں نا ہی اپنی  مدد آپ ، اپنے  علاقے کی پسماندگی دور کرنے کی کوشش کرتے ہیں  بلکہ صرف اپنی پسماندگی کے لئے بعض دیگر  افراد کو  قصور وار ٹھراتے ہوئے دل کی بھڑاس  نکالنے کو  اپنا  مشغلہ سمجھتے ہیں . یا کسی کی دشمنی میں اسکی  لائی ہوئی اسکیم کامیاب ہونے نہیں دیتے ہیں. ایسی قوموں کو ترقی اور پیشرفت نصیب نہیں ہوتی ہے (اگر چہ یہ اس کام میں حق بجانب ہی کیوں نہ ہو۔)  ایسی قوموں کے نصیب میں دوسروں کے سامنے دم ہلانے اور انکی خوشی کی خاطر ناچنے کے سوا کچھ نہیں ہوتا ہے.

ترقی اور پیشرفت اس قوم کا قدم چومتی ہیں جو  اپنے  پاوں  پر کھڑے ہونے کی انتھک کوشش کرتی ہے.  ذمہ دار اور  سماجی افراد (نمایندوں) کی عدم  توجہ یا کم توجہی کی صورت میں وہ ہاتھ پر هاتھ دھرے  نہیں رہتی ہے بلکہ متحد اور یک صدا ہوکر اپنے حقوق حاصل کرنے کے لئے تگ و دو کرتی ہے ناکامی کی صورت میں اپنے موجوده اور آنے والی نسلوں کے بارے میں احساس  ذمہ داری کرتے ہوئے، اپنی مدد آپ، اپنے پیروں پر کھڑے ہو کر اپنے  علاقے کی تعلیمی اور دیگر  پسماندگیوں کو دور کرنے  کی انتھک کوششیں کرتی ہے. اپنے  معاشرے میں موجوده باصلاحیت افراد کی نشاندہی کر کے انہیں معاشرے  میں  ابھرنے اور  اپنے آپ کو منوانے کا موقع بخشتی ہے.  ایسی قومیں ہمیشہ سرفراز رہی ہیں اور  ہمیشہ با وقار  اور باعزت   رہے گی.

اب ہم خود  فیصلہ کرے کہ ہماری قوم  کا  شمار کن میں ہوتاہے. مگر توجہ رکھنا  که اسلام کا تقاضا ہے که هم اپنے پیروں پر کھڑا ہونا سیکھیں۔

تبصرے
Loading...